„Askush nuk don që të ikë nga shtëpia e vet për shkak të dhunës“ dhe „Askush nuk don që të rrihet në shtëpinë e vet“, janë disa prej porosive të cilat këto ditë mund të dëgjohen në kuadër të fushatës mediatike „Nënshkruaj“, qëllimi i së cilës është pengimi i dhunës ndaj gruas dhe i dhunës në familje.

Fushata angazhohet për ngritjen e vetëdijes publike rreth nevojës për ratifikimin dhe aplikimin e Konventës për Pengimin dhe Luftimin e Dhunës ndaj Grave dhe të Dhunës në Familje të Këshillit të Evropës, të njohur edhe si Konventa e Stambollit.

Ky dokument për herë të parë i rregullon të gjitha format e dhunës ndaj grave, përfshi edhe dhunën në familje. Gjer më tani 27 vende e kanë nënshkruar Konventën, ndërsa 8 e kanë ratifikuar. Maqedonia e ka nënshkruar Konventën në korrik të vitit 2011, por imponohet nevoja për shpejtimin e procesit për ratifikimin e saj, për shkak se sistemi për mbrojtje nga dhuna në familje në Maqedoni ballafaqohet me shumë sfida, të cilave institucionet shtetërore duhet t’u japin përgjigje.

Pjesë e fushatës janë edhe peticioni onllajn dhe mekanizmi për të ashtuquajturin “bombardim” i institucioneve dhe organizatave relevante me porosi elektronike, që mund të gjenden në http://www.potpisuvam.org/mk/potpisuvam.html. Fushata „Nënshkruaj“ është pjesë e projektit rajonal „Me përpjekje të përbashkëta-drejt standardeve të reja evropiane në mbrojtje të gruas nga dhuna me bazë gjinore“, që është i financuar nga Bashkimi Evropian, të cilin në Maqedoni e zbaton OJQ Këshilli Nacional për Barazi Gjinore.

Më shumë informata për projektin dhe për fushatën mund të gjeni në vegëzat në vazhdim: www.sozm.org.mk dhe www.potpisuvam.org